உண்மைதான் மேற்படி விடயம் தொடர்பாக வாசிக்கம் போது முஸ்லிம் காங்கிரஸ் கட்சியை பதிவதற்காக சுமார் 27 ஆண்டுகளுக்கு முன்பு தேர்தல் ஆணையாளரை மறைந்த தலைவர் எம்.எச்.எம் அஷ;ரப் அவர்களுடன் அக்கட்சியின் பொதுச் செயலாளருமான நானும் சட்ட வல்லுனரான பாயிஸ் முஸ்தபாவும் சென்றிருந்த போது அப்போதைய தேர்தல் ஆணையாளர் திரு. சந்திர ஆர். டி.சில்வா அவர்கள் எங்களைப் பார்த்து கூறியதைப் போல்தான் இப்போதையத் தேர்தல் ஆணையாளரும் ஆலோசனை வழங்கியுள்ளார் என்பதனை இங்கு நான் ஆச்சரியத்துடன் ஞாபமூட்டிப் பார்க்கின்றேன்.
அதாவது முதலில் முஸ்லிம் காங்கிரஸின் பெயரை மாற்ற வேண்டும் முக்கியமாக முஸ்லிம் என்ற சொல்லை நீக்க வேண்டும் என்று கேட்டுக் கொண்டார். மேலும் இன ரீதியில் அரசியல் கட்சிகளின் பெயர்கள் பதிவதில்லை என்றும் மறுத்துரைத்தார்.
ஆனால் மறைந்த தலைவர் அஷ;ரப் அவர்கள் அதற்கு இணங்கவுமில்லை தேர்தல் ஆணையாரின் ஆணைக்குப் பணியவுமில்லை.
அப்படியென்றால் எங்களுக்கு முன்பு பதிந்த ‘தமிழ்’ அரசுக் கட்சியில் உள்ள தமிழ் என்ற சொல்லுடன்தான் அன்றும் அங்கீகரிப்பட்டுள்ளது என்ற நீண்ட காரசாரமான விவாதத்தின் பின்பு பல சட்ட நுணுக்கக் கோட்பாடுகளையும் கட்சியின் ஆவணங்களையும் நாங்கள் சமர்ப்பித்தோம்,
இதே முஸ்லிம் காங்கிரஸ் தான் அரசியல் கட்சியாகவே 1980ஆம் ஆண்டு தோற்றுவிக்கப்பட்டது என்றும் அது காத்தான்குடியில் நடந்த அங்குராப்பணக் கூட்டத்தில்தான் எங்களால் தெரிவு செய்யப்பட்ட இதே பெயர்தான் அன்று சூட்டப்பட்டது எனவும் வாதிட்டோம்
எனவே பெயரை மாற்றமாட்டோம், முஸ்லிம் என்ற சொல்லையும் நீக்கமாட்டோம் எனத் தெரிவித்ததுடன் ஏறக்குறைய கடந்த 6 ஆண்டுகளாக இப்பெயருடன்தான் செயற்பட்டு வருவதாகவும் ஆணித்தரமாக ஆதாரங்களுடன் எங்கள் நிலைப்பாட்டை நிலைநிறுத்தினோம்.
இந்நிகழ்வு 1986ம் ஆண்டு கொழும்பு – 7, றோயல் கல்லூரிக்கு அருகாமையில் உள்ள கேம்பிறிச் பிளேசில் அமைந்திருந்த தேர்தல் ஆணையாளரின் காரியாலயத்தில் நடைபெற்ற நீண்ட விவாதத்தின் ஒரு பகுதிதான் இது.
இக்கட்சி 1980ம் ஆண்டு முதல் 1986ம் ஆண்டு பதியும்வரை அன்றுமுதல் அரசியல் ரீதியாக மட்டுமே எமது பிரதேசத்தில் செயற்பட்டு வந்தன என்பதற்கான ஆவணங்கள் அத்தனையையும் பத்திரிகைச் செய்திகள் கடிதத் தொடர்புகள் அச்சடிக்கப்பட்ட துண்டுப் பிரசுரங்கள் கூட்டக் குறிப்புகள் எல்லாவற்றையும் ஒருமித்து சமர்ப்பித்த போது தேர்தல் ஆணையாளரினால் எதுவும் பேச முடியவில்லை.
கடந்து வந்த 6 ஆண்டுகளுக்கான ஆவணங்கள்தான் அக்கட்சியைப் பதிவதற்கும் அன்று உதவியது என்பதுதான் நிதர்சனமான உண்மை.
மறைந்த மாமனிதரின் விவாதத் திறமையும் பாயிஸ் முஸ்தபாவின் சட்ட வியாக்கியானமும் என்னால் சமர்ப்பிக்கப்பட்ட ஆவணக் குறிப்புகளும் கட்சி நடவடிக்கைக் கோவைகளும் ஆதார பூர்வமாக இருந்ததினால் அப்போதைய தேர்தல் ஆணையாளரினல் எங்களுக்கு எதிராக எதுவும் பேச முடியவில்லை.
இறுதில் இக்கட்சிக்கு முஸ்லிம் என்ற அப்பெயருடன்தான் பதியப்பட்டது. அச்சொல் வெட்டி நீக்கப்படவில்லை என்ற ஒரு வரலாற்றுச் சரித்திரத்தை இவ்விடத்தில் இன்றும் குறிப்பிட்டுக் காட்டுவதில் பெருமைப்படுகின்றேன்.
இதுவரை இக்கட்சியின் பெயரால் சுமார் 25 நாடாளுமன்ற பிரதிநிதிகளும் 1000க்கு மேற்பட்ட மாகாண சபை, மாநகர சபை, நகரசபை, பிரதேச சபை போன்ற அரசியல் அதிகார உறுப்பினர்களை நாடு பூராகவுமிருந்து பெற்றுவந்துள்ளது. இன்றும் பெற்றுக் கொண்டிருக்கின்றது.
இது இக்கட்சியில் வரலாற்றுச் சம்பவும் சரித்திரமும் சாதனையுமாகும். அத்துடன் உத்தியோகம், உயர் தொழில், துறைமுகம், பல்கலைக்கழகம், அரச, தனியார் நிறுவனம் என்று பல்லாயிரம் பேர் இவர்கள் எல்லோருக்கும் இந்த முஸ்லிம் காங்கிரஸ் தான் மூலதனம். அவர்களின் அடித்தளமும் அத்திவாரத்தின் அடிக்கல்லும் அந்த சீதேவிதான். சுபஹானல்லாஹ்!
இது போன்ற எண்ணற்ற தடைகளையும் தாண்டித்தான் அவைகளை நாம் கடந்து வந்துள்ளோம். நாங்கள் பெற்ற அப்போதைய வலிகளின் வேதனைகளையும் இப்போதைய இந்த ‘முஸ்லிம்’ அரசியல்வாதிகள் எத்தனை பேருக்குத்தான் தெரியும் என்பது எனக்கு என்னவோ இன்னும் சந்தேகம்தான்.
அந்த முஸ்லிம் என்ற சொல் அன்று நீக்கப்பட்டிருந்தால் இன்றுள்ள இவர்களில் பலர் நாடாளுமன்ற கதிரைகளைக் கண்டிருப்பார்களா என்று அண்மையில் வெளியான இலங்கை முஸ்லிம்களின் அரசியல் வரலாற்று ஆய்வுப் புத்தகத்தில் அந்த ஆய்வின் ஆசிரியர் குறிப்பிட்டு எழுதியுள்ளதை இத்தருணத்தில் இங்கு தொட்டுக்காட்ட விருப்புகிறேன்.
கடந்த 33 ஆண்டுகளாக முஸ்லிம் அரசியல் விடுதலைப் போராட்டதில் இன்றுவரையும் இக்கட்சியுடன் என்னை இணைத்துக் கொண்டு இடைவிடாது இம்மண்ணின் மேல் தொடர்ந்து பயணிக்கும் ஒரே ஒரு முஸ்லிம் காங்கிரஸின் மூத்த முதல்வன் இவன் மட்டும்தான். வேறு எவரும் எம்மத்தியில் இன்று இல்லை. அல்ஹம்துல்லாஹ்!
