(எம்.பைஷல் இஸ்மாயில்)
அரசாங்கம் எதிர்வரும் 15 ஆம் திகதிக்கு முன்பாக எரிபொருள் மானியம் வழங்காதுவிடின் நாடாளாவிய ரீதியில் வேலை நிறுத்தத்தில் ஈடுபடப்போவதாக இலங்கை தனியார் பஸ் உரிமையாளர் சங்கம் அறிவித்துள்ளது.
பஸ் கட்டண உயர்வுக்குப் பதிலாக அரசாங்கம் தமக்கு எரிபொருள் மானியம் தருவதையே தாம் விரும்புவதாக தனியார் பஸ் உரிமையாளர் சங்கத்தின் தலைவர் கெமுனு விஜயரத்ன தெரிவித்துள்ளார்.
மேலும் எதிர்வரும் 14 ஆம் திகதி பஸ் கட்டணங்ளை உயர்த்த அனுமதிப்பதாக அதிகாரம் வாய்ந்தவர்கள் கூறியிருந்தனர். ஆனால் இப்போது அதைச் செய்ய மறுத்து தமது வாக்குறுதியை மீறியுள்ளனர்.
இப்போது அவர்கள் இந்த விடயத்தை பற்றிப் பேசுவதை தவிர்த்து வருகின்றனர். எமக்கு நிதிவடிவில் அல்லது எரிபொருள் வடிவில் உதவி வழங்குவது அவசியம்.
இதில் ஏதோவொன்றை அரசாங்கம் தர மறுக்குமாயின் முன்னறிவித்தலின்றி பஸ் வேலை நிறுத்தத்தை தொடங்குவோம். தனியார் பஸ் உரிமையாளர் சங்கத்தின் தலைவர் தெரிவித்துள்ளார்.
சேவையிலுள்ள சுமார் 20 ஆயிரம் பஸ்களில் 16 ஆயிரம் பஸ்கள் தனியாருக்கு உரியவை. 4 ஆயிரம் பஸ்களை மட்டும் சேவையிலீடுபடுத்த இலங்கை போக்வரத்து சபைக்கு தேசிய போக்குவரத்து ஆணையகமும் தனியார் போக்குவரத்து சேவைகள் அமைச்சும் 280 இலட்சம் ரூபா உதவியை வழங்கியுள்ளன. ஆனால் எமக்கு இந்த உதவி கிடைப்பதில்லை. என்று சுட்டிக்காட்டியுள்ளார்.
லஞ்சத்தின் அடிப்படையில் சட்டத்தை மீறி பஸ் அனுமதிகள் வழங்கப்படுவதால் கிட்டத்தட்ட ஒரு பில்லியன் ரூபா நஷ்டம் அரசாங்கத்துக்கு ஏற்பட்டுள்ளது என்பதும் குறிப்பிடத்தக்கது.
